Tago

Nahuman ra gyod ang pagpangita sa pangulo sa Kingdom of Jesus Christ nga si Pastor Apollo Quiboloy human siya mitahan sa iyang kaugalingon ngadto sa labaw sa Intelligence Service sa armadong kusog sa nasud.

Apan daghang kilay ang miisa human makita sa publiko nga nagbukot ang dagway sa pastor dihang gipresentar siya sa kapolisan ngadto sa publiko. Gipakita man tuod ang dagway sa pastor nga wala magbukot apan hanap usab kining tanawon ug dili maklaro ang dagway niini. Hinungdan nagduda pa ang uban nga dili ang pastor ang gipresentar sa mga polis.

Hinuon nahanaw ra ang mga pagduda dihang gipakita ni Interior Secretary Benhur Abalos ang kuha nga mugshot sa pastor.

Gipasabot sa tigpamaba sa kapolisan sa nasud nga wala nila gipakuha ang gibukot sa dagway sa pastor dihang ila kining gipresentar sa medya tungod kay mao kini ang gitambag kanila sa Commission on Human Rights. Matud pa sa kapolisan nga makalapas sa tawhanong katungod ni Pastor Quiboloy kun ipakit ang iyang dagway sa publiko.

Kanus-a lang nahimong kalapasan sa tawhanong katungod ang pagpresentar sa dinakpan ngadto sa publiko nga wala nakabukot ang dagway niini? Karon lang ba kini? Kay kun bago pa lamang kini mora’g makaingon ta nga tinudlo gyod nga anak sa Ginoo ang pastor.

Dili makalimod nato ang kapolisan nga ang mga simpling tawo nga ilang nadakpan hapit nalang nila huboan kay dili sila gusto nga tagoon ang dagway sa krimininal.

Karon nga si Quiboloy na maoy ilang gipresentar kalapasan na sa tawhanong katungod ang pagpakita sa iyang dagway? Ilara ang lolo ninyong opaw.

Klaro kaayo nga ang paghatag og pabor ni Secretary Benhur Abalos ngadto kang Quiboloy paagi kini sa iyang pagpangayo og suporta sa umaabot nga piniliay kay dili ikalimod nga adunay daghang sumusunod nga mga botante ang pastor.