Alisbo sa mga Marcos
Walay kapuslanan ang pagkumparar sa popularity ratings nilang Presidente Ferdinand Marcos Jr. ug Bise Presidente Sara Duterte Carpio sa nasudnong surveys human nabungkag ang ilang alyansa. Dili sila managan sa eleksiyon sunod tuig kay ang ilang termino kutob sa 2028.
Pero ang padayon nga pagsaka sa ratings ni Marcos ug ang pagkanaog sa ratings ni Carpio mahimong makapasabot nganong mingaw ang Maisug rallies ni kanhi Presidente Rodrigo Duterte sa nagkalainlaing bahin sa nasud. Ug nganong pipila ra ang nagtapok sa Liwasang Bonifacio dihang gilusad nila ang Edsa People Power Tres.
* * *
Mahimong mosamot pa gyod pagsulbong ang ratings ni Marcos human sunudsunod nga nadakpan silang Alice Guo (pila ka adlaw human nabalik sa Pilipinas silang Sheila Guo ug Cassandra Ong) ug Apollo Quiboloy (human sa lima ka buwan nga pagtago). Makatabang sab ni Marcos ang gitakdang paghibalik ni kanhi Kongresista Arnie Teves (human gipatigbabaw sa korte sa Timor-Leste ang iyang extradition).
Pero bisan giunsa og paningkamot ni Marcos pagpahumot, wala kalikayi ang paghungaw sa timaan sa kalang-og sa iyang mandato. Nga karibalan lang sa kaluod sa iyang gigikanan ug katuyoan.
* * *
Ang kredito sa pagkasikop ni Guo namantsahan sa iresponsable nga selfies ug nasobrahang paghangop sa dinakpan sa mga representante sa administrasyon nga gipangulohan ni Kalihim Benhur Abalos sa Department of Interior and Local Government (DILG).
Napahinumdoman hinuong katawhan nga ang administrasyon igo lang nidawat og limpiyo kay ang nakasikop nilang Guo mao man ang gobyerno sa Indonesia. Nisamot sang pagduda kay wala pa mahibaw-i ug wala pa masiloti ang mga kakonsabo sa paglayas nilang Guo.
* * *
Nakabawi hinuon dayon ang administrasyon sa pagkasikop ni Quiboloy. Nilampos ang 16 ka adlaw nga kutas nga operasyon sa kapin 4,000 ka mga polis ug mga sundawo bisan sa pagsabotahe sa mga Duterte. Pero naputol ang kasaulogan sa pahinumdom nga ang presidente anak sa labing kawatang magtiayon sa kasaysayan.
Nigasto og P3.19 bilyones sa buhis sa katawhan pagsaulog sa iyang birthday. Ug nikiat sa pribadong konsiyerto sa Duran Duran nga gipasalig nga gasto sa iyang mga higala. Gawas nga makapabalaka unsay bugti, makapasuko nga makawaldas og kuwarta samtang padayong napakyas pagtambal sa sakit ug kagutom sa kinabag-an.
* * *
- Latest
