Diskriminasyon

Nagpagawas og suplemento nga resolosyon ang Commission on Elections  nga naglakip na nga makonsiderar nga election offense sa pag gamit og mga dili maayo nga pulong panahon sa pagpangampanya.

Reaksiyon kini sa Comelec human duha ka kandidato sa pagka kongresista sa Pasig ug pagka Gobernador sa Misamis Oriental ang gireklamo og diskriminasyon, kalapasan sa Fair Election Act ug Safe Place Act.

Si Atty. Christian Ian Sia kandidato sa pagka Kongresista sa Pasig City atol sa iyang pagpangampanya miingon nga kadtong mga solo parent nga gidugo pa ug nagmasulobon poyde nga modulog kaniya samtang si Gobernador Peter Unabia sa Misamis Oriental atol sa iyang pagpangampanya miingon nga ang mga makaapil sa scholarship sa probinsiya kadto lamang mga babaye nga dili mga maot og dagway. Matud pa niya nga kun ang moatiman sa mga pasiyente nurse nga bati og nawong basin mosamot ang sakit sa pasiyente. Diskriminasyon.

Ang scholarship dakong tabang sa mga tinun-an nga dili makaabot sa gastoganan sa pagtungha sa kolehiyo pero kun ang makapahimulos niini kadto lamang mga babaye nga guwapa ug way labot ang mga lalaki ug mga bati og nawong, kalapasan kini sa equal protection of the law. Ok lang unta kun personal nga salapi ni Gobernador Peter Unabia ang iyang gastoon sa mga iskolar kay siya ra ang magboot apan salapi sa gobyerno ang iyang gamiton.

Si Atty. Sia wala makasabot sa sirkumstansiya nga nagpaluyo sa kinabuhi sa 15 milyones ka mga Solo parent sa nasud diin 95 porsiyento kanila mga babaye.

Si Atty. Sia ug Governor Unabia kabahin lamang sa daghang kandidato nga pariha kanila og estelo sa pagpangampanya.

Sila ang mga kandidato nga dili puwede nga gahinan sa inyong boto.