Manila North Cemetery, may abiso para sa Undas
MANILA, Philippines — Maagang nagpalabas ng paalala ang pamunuan ng Manila Health Department (MHD) upang magkaroon ng sapat na panahon na paghandaan ang pagtungo sa Manila North Cemetery para sa Undas 2024.
Batay sa inilabas na abiso, mayroon na lamang 20 araw para sa paglilinis, pagpipintura at pagsasaayos sa mga puntod na nagsimula na nitong Setyembre 15 at magtatapos sa Oktubre 25.
Hindi na rin maaaring tumanggap ng cremation o paglilibing, paglagpas ng Oktubre 28.
Sarado na rin ang tanggapan ng Manila North Cemetery simula Oktubre 27 hanggang Nobyembre 3, 2024.
Sinabi na muling magbubukas ang serbisyo ng cremation at paglilibing sa Nob. 4, gayundin ang pagbubukas ng opisina ng sementeryo.
Simula Okt. 24 hanggang Nob. 4 ay bukas ang main gate ng sementeryo mula alas-5:00 ng umaga hanggang alas-5:00 ng hapon lamang.
Ipinagbabawal na dalhin sa loob ng sementeryo simula Okt. 28 hanggang Nob. 4 na panahon ng Undas ang alak o mga nakalalasing na inumin; flammable materials tulad ng thinner at pintura; baril at patalim; deck cards, bingo cards at iba pang gamit sa pagsusugal.
Ipinagbabawal din ang magsama ng mga alagang hayop gaya ng aso at pusa sa loob ng sementeryo.
- Latest
