Kapolisan andam sa Pasigarbo

CEBU, Philippines — Gibutyag sa Cebu City Police Office(CCPO) nga 90 porsyento na sila nga andam sa ipatumang seguridad sa Pasigarbo sa Sugbo 2024 karong Agosto 25, 2024, diha sa Cebu City Sports Center.

Sigon ni Police Colonel Antonietto Cañete, Acting City Director sa CCPO nga duna sila'y final coordination meeting sa ubang ahensiya sa gobyerno.

Subay niini, si acting Cebu City Mayor Raymond Alvin Garcia mibisita sa Cebu City Sports Center ug gitan-aw unsay mga kakuwangan ug angay pang trabahuon aron mahan-ay ang tanan.

Gitataw sa acting mayor way kasiguradohan nga dili maguba ang track oval ilabi na nga dunay stage nga gitukod, nagdala og mga puthaw, naay mga sakyanan, mga bug-at ang gipangdala nga mga speaker ug uban pa.

Apan gipaniguro ni Garcia nga human sa Pasigarbo sa Sugbo himoon ang major repair sa rubberized track oval.  Sa inisyal nga pamahayag ni Garcia nga human sa Pasigarbo isira unta ang Cebu City Sports Center og usa ka buwan aron masakto ang curing ug ang pagtaod.

Apan ang Cebu City Sports Center Board niduol kang Garcia ug miingon nga P1.5 million ang kita sulod sa usa ka buwan ug sayang kun isirado ang track oval.

Samtang ang Banauan Cultural Group sa Barangay Guadalupe sa dakbayan sa Sugbo maoy gipili sa siyudad isip guest contingent sa Pasigarbo sa Sugbo 2024.

Ang maong grupo gipili ni acting Mayor Raymond Alvin Garcia isip guest contingent tungod sa dili pa lang dugay nga kalampusan nila sa nilabay nga Aliwan Fiesta 2024.  Matud ni Garcia ang maong grupo maoy ikalima atol sa Aliwan nga nagrepresentar sa Sinulog, hinungdan nga haum kaayo sila sa Pasigarbo sa Sugbo.

Si Garcia niklaro nga dili na sila modugang ug hatag og financial assistance ngadto sa maong grupo tungod kay aduna may pundo nga gihatag ang Cebu Provincial Government. (BANAT NEWS)