Contractor maoy pagastohon sa pagpatrabaho sa oval sa CCSC

CEBU, Philippines — Si Konsehal Rey Gealon sa Dakbayan sa Sugbo nipahigayon og privilege speech diin nanawagan kini kang Acting Cebu City Mayor Raymond Alvin Garcia nga ipahigayon dayon ang pagtrabaho sa Cebu City Sports Center kinsa ang mogasto niini ang contractor.

Ang panawagan ni Gealon nitumaw human nga usa ka atleta kinsa nagbansay-bansay napiang ang kumingking niini sa walang kamot tungod sa uneven nga track oval.

Si Karla Katrina Kim Arriba lakip unta sa mosangka sa Karate tournament sa Dumaguete City Sports Festival Tournament apan wala kini madayon gumikan sa maong hitabo.

Matud ni Gealon nga sa pagkakaron kinahanglan una nga isirado ngadto sa publiko ang CCSC aron malikayan ang laing insidente.

Base sa Article 2189 sa Civil Code of the Philippines tulobagon sa Siyudad sa Sugbo ang nahitabo sa maong atleta.

Sayo pa, ang siyudad nigasto og P54 milyones alang sa pag-renovate sa sports center lakip na ang pagtarong sa track oval.

Nasayran nga si Gealon nakadawat og demand letter nga gi-address ngadto sa SBD Builders kinsa maoy contractor sa oval sa CCSC kabahin sa maong insidente. Base sa demand letter, niadtong Agosto 29, nagbansay-bansay si Arriba diha sa track oval ug gibuhat ang mga karate drills, scrimmages ug sprints apan dihang anaa na kini sa iyang kataposang sprint nasukamod kini hinungdan sa pagkapiang sa kumingking niini.

Dali nga gidala ngadto sa Vicente Sotto Memorial Medical Center si Arriba aron nga ma-operahan.

Ang maong atleta nangayo kini og danyos nga P880,000 alang sa iyang medical expenses, loss of income ug moral damages. (BANAT NEWS)