2 ‘wanted’ Chinese, nalambat ng BI

MANILA, Philippines — Nakatakda nang ipa-deport ng Bureau of Immigration (BI) ang dalawang Chinese fugitives na naaresto nila kamakailan sa Cebu at Metro Manila.

Ayon kay Immigration Commissioner Norman Tansingco, ang mga naarestong dayuhan ay sina Zhu Yuanjiang, 25, at Ma MIngjie, 51, na nadakip ng mga tauhan ng Fugitive Search Unit (FSU).

Nabatid na si Zhu ay nadakip noong Abril 17 sa Brgy. Umapad, Mandaue City habang si Ma ay naaresto noong Abril 19 sa kanyang tahanan sa isang subdibisyon sa Parañaque City.

Si Zhu ay dating nagtatrabaho sa Xinchuang Network Technology Inc., isang online gaming hub sa Pasay City na ni-raid ng mga local authorities noong Hunyo 2023 dahil sa pagkakasangkot umano sa ilang criminal activities gaya ng human trafficking at cyber fraud.

Samantala, si Ma ay inaresto dahil sa pagiging “wanted fugitive from justice” sa China dahil sa kasong contract fraud. Inisyuhan siya ng warrant of arrest ng Jiangbei district sub-bureau ng Public Security Bureau sa Chongqing, China noong Disyembre 6, 2017.

Ayon sa Chinese authorities, si Ma at kanyang mga kasabwat ay sangkot sa tampering ng bank accounts at account names ng point of sale (POS) machine merchant na nagresulta ng unauthorized transfer ng mahigit 58 million yuan, o mahigit sa US$8 million mula sa China Minsheng Banking Corporation patungo sa kanyang altered bank account.