Grupo ng Taiwanese at Japanese nagrambulan sa bar
MANILA, Philippines — Nauwi sa batuhan ng bote at bugbugan sa pagitan ng pitong Taiwanese nationals at grupo ng Japanese national sa loob ng isang KTV Bar, sa Malate, Maynila, kahapon ng madaling araw.
Kapwa nagsampa ng reklamo ang magkalabang grupo nang pagharapin sa Manila Police District-General Assignment Section.
Alegasyon ng grupong kinabibilangan nina Shisaku Fujita, negosyante, Japanese national at mga kamag-anak na Pinoy na sina Kieth Ravina, 27, at Louigie Villanueva, 22, na ang kasama nilang mga babae na di na pinangalanan ay binabastos habang umiinom sila sa Capricorn Bar dakong alas-4:00 ng madaling araw.
Depensa naman ng mga inarestong Taiwanese nationals na sina Chun Yi Shen, 30; Po Yu Lin, 35; Chen Chang Wu, 30 at Wen Yu Chang, 35, na pinitikan umano sila ng kulangot ng isa sa grupo ni Fujita at dumapo ito sa mukha ng kasama nila.
Nakatakas ang tatlo pang kasamahan ng Taiwanese ng mga suspek.
Ayon sa grupo ni Fujita, dinadaan-daanan ang kanilang kasamang mga babae at kinursunada din umano si Fujita nang magtungo ito sa comfort room.
Dahil dito, kaya umulan ng bote hanggang sa magsapakan ang dalawang grupo ng dayuhan.
Dahil sa dami ng mga Taiwanese, agrabyado ang grupo ng Hapones na si Fujita.
- Latest
