Ex-cop dinedo ng tandem
MANILA, Philippines — Isang 44-anyos na dating alagad ng batas ang nasawi matapos pagbabarilin ng isang magka-angkas sa motorsiklo, kamakalawa ng hapon sa Pasay City.
Sanhi ng tama ng bala sa ulo, dead-on-the-spot ang dating miyembro ng Philippine National Police (PNP) na si Darwin Cruzin, may-asawa at nakatira sa No. 2300 Tramo St., Brgy. 64 ng naturang lungsod.
Sa ulat ng Pasay City Police, alas-3:45 ng hapon nang maganap ang insidente sa kanto ng A. Arnaiz Avenue at Zamora St. sa Brgy. 60 Zone 7 sa Pasay City.
Sakay ang biktima ng ipinapasada niyang tricycle nang dikitan siya ng mga salarin na sakay ng isang motorsiklo at walang sabi-sabing agad na pinagbabaril at mabilis na tumakas patungo sa direksyon ng Edison St. na papuntang Makati City.
Blangko pa ngayon ang pulisya sa motibo ng naturang pamamaslang. Narekober ng mga tauhan ng Scene of the Crime Operatives ang isang napaputok na cartridge buhat sa isang kalibre .45 baril at isang slug.
Patuloy ang imbestigasyon upang matukoy ang background ni Cruzin noong siya’y pulis pa at kung bakit siya naalis sa serbisyo.
- Latest
