Lasalista patay sa hazing, 3 kritikal

MANILA, Philippines - Isang estudyante ng   De La Salle-College of St. Benilde ang patay habang tatlo pa ang kri­tikal matapos suma­­­ilalim sa umano’y hazing­ at iuwi sa condo­mi­nium­ ng isa sa mga bik­­tima kamakalawa ng gabi sa Taft Avenue, Maynila.

Kinilala ni PO2 Michael G. Maraggun ng MPD Homicide Division ang namatay na si  Guillo Cesar Servando, 18, 2nd year HRM student sa DLSU-CSB at residente ng No. 8809 Sampaloc St., San Antonio Village Makati City habang sugatan naman sina John Paul Raval, 18, anak ng  may-ari ng  Unit 2907 sa 29th  floor  ng One Archer’s Place sa no. 2311 Castro St. corner Taft Ave., Manila;  Levin Roland Flores, 17, ng Vista Verde, Bgy. San Isidro, Cainta, Rizal at Lorenze Agustin, 18, ng NLK4 Unit 402 Prime City, St. Paul Road Bgy.San Antonio Makati City. Ang apat na estud­yante ay tadtad ng pasa sa likod at hita.

Ayon kay Maraggun­, 9:30 ng gabi nang umuwi­ ang mga biktima at ma­kalipas ang isa’t kalahating oras ay dumating ang isang ambulan­siya­ ng Philippine Red Cross dahil umano sa paghingi ng responde ng mga occupants ng nasabing condo unit sa Patrol 117.

Agad na tinawagan ng guwardiya ang unit ng condominium kung saan nalaman na isa sa mga biktima ang hindi na hu­mihinga. Dito na pina­akyat ng gu­wardiya ang  PRC.

Unang inakala ng gu­wardiya na mga la­sing  lamang ang apat dahil sa pasuray-suray na  lakad ng mga ito.

Bago ang insidente,  alas-5:30 ng hapon no­ong Sabado, sinundo sina Servando, Raval, Flores at Agustin ng isang lalaki na kinilala lamang sa alyas na Aircon, miyembro at secretary ng Alpha Kappar roho Fraternity ng University of Sto. Tomas­, sa harap ng isang fastfood chain sa tabi ng DLSU sa Taft Ave., Maynila.

Pagkasakay umano ng apat na estudyante sa isang kulay berdeng Honda CRV,  ay piniri­ngan na umano ni Aircon ang mga ka­­sama ng mata ng apat na estudyante saka dinala sa hindi natukoy­ na lugar kung saan isi­na­ilalim sa initiation rites.

Ayon naman kay  Sr. Insp. Steve Casimiro­, hepe ng MPD-Homicide Division nagsasagawa sila ngayon ng follow-up  operation upang matukoy kung totoo ang mga pangalan ng mga taong naghatid sa mga biktima sa condominium.

Naka-log book umano  ang mga  pangalang Trex Garcia at Hans Tama­ring kasama ang ilan  pang kalalakihan na nag­hatid sa mga biktima sa condominium.

Sinabi ni Casimiro na hindi pa rin nila tukoy ngayon ang lugar na pi­nagganapan ng ini­tiation rites. ?? ?

Nabatid kay Casimiro na ang fraternity na si­nalihan ng mga biktima ay Alpha Kappa Rho (AKRHO). Wala pang pa­­hayag ang grupo ukol sa nangyari.??

Subalit ayon sa isa sa kaanak ng mga biktima, sinasabing wala namang chapter ang AKRHO sa CSB.?? Sinasabing ang pinakamalapit na chapter ng grupo ay nasa UST. ??Lumala­bas na malabong mapa­sama ang apat na taga-St. Benilde kung walang miyembro ang naturang frat sa mismong kolehiyo na siyang magre-recruit dito.

Inamin din ni Casimiro­, na nahihirapan silang ku­malap ng impormas­yon sa insidente dahil sa pagtanggi ng pamilya ng mga sugatang biktima na magbigay impormasyon. Mahalaga anya ang pahayag ng tatlo para matukoy ang dapat managot.??

Kinunan na ng paha­yag ang mga guwar­dya ng condo at sinusubukan na ring makakuha ng closed circuit television (CCTV) footage sa fastfood chain malapit sa CSB.?? Ito’y sakaling nahagip ang plaka ng sa­sakyang ginamit sa paghatid sa mga biktima at ma-trace ang may-ari nito. ??

Kaugnay nito, isang “General Raval” ang  si­na­sabing may-ari ng unit.??

Hindi naman makumpirma ng MPD kung nailabas na ang tatlo mula sa PGH at maging ang kondisyon ng mga ito kung iniuwi o inilipat ng ospital ang mga ito.