Karomata una sa kabaw

Gipasabot sa mga kongresista ngadto sa ilang mga konstituwente sa ilang mga distrito ang rason sa ilang pagpirma sa Article of Impeachment batok kang Bise Presidente Sara Duterte Carpio. Usa kanila mao si Kongresista Duke Frasco sa ika lima nga Distrito sa Lalawigan sa Sugbo.

Sa usa ka pulong gipasabot ni Frasco nga silang iyang mga konstituwente ang pinakaunang rason sa iyang pagpirma sa Article of Impeachment. Iyang giingon nga nahadlok siya nga dili mahatagan og budget ang iyang mga proyekto sa distrito kun dili siya mopirma sa Article of Impeachment.

Ang ikaduha niyang rason, personal. Wala kuno tabangi sa bise presidente ang iyang asawa nga si Tourism Secretary Kristina Frasco dihang nakontrobersiyal ang iyang tourism Campaign slogan.

Mao ni problema Kongresman Frasco kun magbuot-buot ka. Midiretso kalang og pirma sa Article of Impeachment nga wala ka mokonsulta sa imong konstituwente. Kun nangonsulta ka pa nila, dili na unta ka mopasabot nila sa imong rason sa pagpirma.

Nahimo ka kongresman nga ehemplo sa panultihon nga nag-una ang karomata kay sa kabaw.

Kun budget ang hisgotan, unsa may imong kahadlokan nga naaprobahan naman ang 2025 budget sa wala pa ninyo pirmahi ang Article of Impeachment, dili ba kongresman?

Ngano nga mahadlok man ka nga walay proyekto ang imong distrito nga dili man kana ang imong trabaho. Ang imong trabaho mao ang pagpanday og balaud ug dili ang pagpabarog og mga proyekto kay trabaho kining pang ehekutibo.

Hapit magkapareha ra ang rason sa mga kongresista. Nahadlok sila nga walay proyekto ang ilang distrito pero aduna pa silay laing rason ug kini mao ang ayuda nga ilang gikapadakan tungod kay gamit kaayo kini sa pagpamalit og boto. Pagpamalit og boto gamit ang kuwarta sa gobiyerno. Dili ba ni abuso?