Delikado

Makalilisang ang kasayuran nga gitug-an sa volunteer electrical engineers nga naglangkob sa audit team gikan sa Institute of Integrated Electrical Engineers of the Philippines, Inc. mahitungod sa tinud-anay nga kahimtang sa Cebu City Medical Center (CCMC).

Atol sa executive session sa konseho sa dakbayan niadtong Martes, gitug-an ni Engr. Brian Pacilan nga labihan ka delikado sa CCMC alang sa publiko. Gihulagway niya nga “very unsafe” ang tambalanan tungod sa wala magkadimao nga electrical wirings niini.

Segun sa ilang gihimo pakisusi walay “reliable grounding system” ang CCMC ug dili kumpleto ang generator synchronization panels niini. Wala sab magtakdo ang “busduct installations” ug PVC conduits maoy gigamit inay nga puthaw sigun sa plano.

Nasayran sab sa mga volunteer electrical engineers nga lakip ang emergency standby wiring sa tambalanan pulos temporary hinungdan nga ang ubang biomedical equipment wala na mag-andar. Sigun sa audit team, ang tibuok CCMC building labihan ka piligro sa sunog ug electrical shocks. Busa dili ta mahibulong og simbako usa niining mga adlawa makadungog ta nga dunay nakuryentehan sulod sa maong tambalanan.

Mao ni resulta kun labihan ka daghan sa kontraktor nga motrabaho sa usa proyekto. Kun imong lingi-on ang history niining maong proyekto mahimo na tingali ni natong isalmot sa Guinness of World Records isip proyekto sa gobyerno nga dunay labing daghang kontraktor ug way human-human.

Nagsugod ang Phase 1 sa proyekto niadtong 2015 pinaagi sa C.E. Padilla Construction diin duna ni contract price nga ?514.9 million. Niadtong 2020 ang Phase 1.1 nga dunay budget nga P36.1 million gihatag ngadto sa Charly Construction.

Ang Phase 2 nga gisugdan sab niadtong 2019 pinaagi sa Padilla Construction duna say budget nga ?283.4 million samtang ang Phase III nga mokantidad og P99.8 million gihatag sa C.B. Garay Philwide Builders.

Ang Phase IV nagsugod niadtong 2022 pinaagi sa M.E. Sicat Construction/AVECS JV sa kantidad nga ?907.9 million. Ang maong kontrata hinuon giterminate tungod sa kapakyas sa kontraktor pagtuman sa iyang obligasyon. Ug sa miaging tuig ang Phase V nga mokantidad og ?683.9 million gi-award ngadto sa Dakay Construction.

Sigun sa record, ang proyekto migasto na og ?1.8 billion apan nagpabiling wala mahuman ang tambalanan.