Increase gamay ra

Gigamyan ra ang mga empleyado sa pribadong sektor sa gipahibawo nga umentohan ang minimum nga sweldo og bali’g P42 ang adlaw sugod karong Oktubre 14.

Tinuod, gamay ra gyud apan maayo na lang na kay sa wala gyuy umento, unya nagpadayon pagsaka ang presyo sa mga palaliton. Abi ninyo og kinsa ang naalaot niini? Ang mga way trabaho tawon.

Pananglit ako, wa na ko’y trabaho, wa ko’y dugang kapin sa usa ka libo ka pesos nga nakuha. Way lalis nga gamay ra gihapon ang P584 nga sweldo, ilabi na kon minyo na og may mga anak.

Apan kinahanglan man gud nga balansehon pag-ayo kay kon mangayo kita og dako kaayo nga umento sa sweldo, sigurado man nga daghang employers ang dili na makaabot sa paghatag og mosirado na lang.

Kon mahitabo kini, daghan kaayo ang mawad-an og trabaho ug mosamot ang kapait sa kahimtang.

Lisud gyud karong panahona kay kon magnegosyo ka sab, pananglit mamuhi ka og baboy, alkanse gihapon kay pwerteng baratoha sa pagpamalit sa mga baboy karon nianang mga abusadong kumprador.

Sayonan ka nga ang inihaw na nga baboy, paliton lang og P230 ang kilo, unya utangon pa usa? Daghan sa mga kumprador nga mga tag-iya og stalls sa merkado ang di pa gyud dayon mobayad sa ilang bayronon.

Daghan kanila nga nagnegosyo nga laway ra ang puhonan, kay kuhaon nila ang baboy nga utang, unya kon mahalin na, dili pa dayon bayaran ang tag-iya.

Mao ni ang rason nga dunay dapit didto sa Mindanao nga ang litson gibaligya na lang sa P380 ang kilo. Matud sa tag-iya arang-arang na lang ang P380 kay sa P230 nga pagpalit sa mga abusadong kumprador og mga baboy.

* * *

Kining kinabuhi nato, dili lang gyud mahibaw-an kon kanus-a kutob. Ang kauban ko sa programa sa radyo, nag-uban pa mi sa pagprograma niadtong Biyernes.

Gikan sa alas 7:30 ngadto sa alas 8:00 sa buntag ang programa namo ni Sam Costanilla. Human sa programa, mibiya siya ug mipauli. Alas 8:22 (base sa CCTV footage), mihunong ang awto ni Sam sa kilid sa barangay hall sa Barangay Inayawan, Cebu City.

Wa na siya makagawas sa awto kay giatake tungod sa sakit nga diabetes. Domingo sa buntag na nga nadiskitahan nga patay na si Sam sulod sa awto.

Ang nakapait pa gyud kay gi-cremate ra siya dayon nga ang iyang mga higala wa na makakita niya. Sakit no? Maayong tawo ug buotan si Sam, mao nga bisan og nagkakuyog mi kaniadto lang Marso, suod na mi kaayo.

Ingon gyud niini ang kinabuhi, mangandam ta kanunay.