EDITORYAL - Usbaw sa pletihan, daghang nakuratan

Daghang mga pasahero ilabi na mga estudyante ug senior citizens ang nakuratan sa kalit nga usbaw sa pletihan sa mga pasaheroan kagahapon, bisperas sa adlaw sa planong pagpahigayon og transport strikes karong adlawa tungod daw sa kamahal sa presyo sa lana.

Kagahapong adlawa, nakalitan ang mga pasahero tungod kay ang kaniadto pleti nila nga P13 gihimo nang P14 ang minimum fare sa traditional jeepney ug P17 na gikan sa P15 kung sa modern jeepney.

Ang resulta duna gyuy kalibog nga nahitabo, ug dunay mga pasaherong nakiglalis sa mga drayber ug konduktor ilabi na nga wala man igdungog kaayo sa mga balita ang maong usbaw sa pletihan.

Gani wala kaayo ni mahisguti sa mga nagkadaiyang media outlets nga duna diay usbaw sa pletihan nga nag-ung ong ug nakalitan nalang sa dihang gipatuman kini sugod kagahapong adlawa, Septembre 28.

Normal kini nga reaksyon sa mga sumasakay nga apil pud sa naapektahan aning kalisod nga epekto sa pagsaka sa presyo sa lana sa tibuok kalibotan samot na nga walay napakitang dokumento o fare matrix ang mga drayber nga naka-paskin diha sa ilang sakyanan.

Ang ingon sa Land Transportation Franchising and Regulatory Board (LTFRB) wala pa silay giisyu nga opisyal nga fare matrix aron ipatuman ang increase, apan dunay mga drayber ug konduktor nga naningil na og usbaw bisan og wala silay napakitang dokumento nga magpatuod niini.

Samot og kalibog ug nasuko ang mga pasahero niini. Samot na kay ang nahibaw-an sa publiko, gitabangan na sa gobiyerno pinaagi sa nagkalain-laing subsidiya, ayuda  ug programa sa Department of Transportation ang sector sa transportasyon nunot sa epekto sa krisis sa lana karon.

 Ang LTFRB niingon nga sa Enero pa sila maka-isyu og opisyal nga fare matrix, apan duna daw downloadable nga fare guide gikan sa ilang website nga puydeng ipa-printa sa mga drayber ug operators para maoy basihan sa ilang bag-ong pletihan.

Karong adlawa, bisan pa sa bag-ong usbaw sa pletihan, duna gihapoy mga militanteng mga transport groups ang gikatakdang mag strike tungod sa kamahal na karon sa presyo sa lana, kamatuorang walay kontrol ang Pilipinas.