‘Pangheserye at Kalyeserye’
![](https://qa.philstar.com/images/authors/1399221.jpg)
Tanong: Ano ba ang tama, IHI o IHE?
Sagot ay pareho itong MALI at MALE!
Lalo kung ididilig sa pader o poste
Pagkat paligid nati’y magiging MAPANGHE!
Babala: (Asawa ni Babalu?), ah basta!
Dyumidyingel sa kalye ang sagwa makita!
Matagal nang problema ‘yan tulad ng EDSA!
Anak ng porta ... let ... se! Dapat nasa SONA!
Kung bawal wang-wang dapat na rin pati WI-WI!
‘Yan hanggang ngayon masama nating ugali
Na hindi maalis at hindi ko mawari,
Parang dito lang ‘yan, sa ibang bansa hindi!
Wala naman tayong ginagawa talaga,
Puro sulat lang kasi ‘yun ang problema,
Dagdag gulo’t dumi lang mga paalala,
Tuloy “taktak-kilig” pa ri’t patay malisya!
Sa ibang bansa ay bihira mong makita
Ang mga “BAWAL” at “DO NOT” na karatula,
Pagkat unang-una sila’y may disiplina
At gobyerno nila ay may mga pangontra!
Katulad sa nightclub district sa Alemanya
Kung saan maraming nagpaparaos baga
Dahil sa iniinom syempre na serbesa,
Sa mga pader dun ay may ginawa sila!
Ultra-Ever Dry tawag sa ipinintura
Sa mga pader dun at pag isang engot na
Sobrang ihing-ihi at magpapa-ginhawa,
Gishing lashing! Dyingel tatalbog sa kanya!
Iba naman nakita nung nagtungong Roma,
Mga sulok nila sinadyang naka-ALSA!
Nakaumbok at “buntis” ang sulok kumbaga,
Kaya talbog at talsik din sa ‘yo... basa ka!
Eh dito nga sa atin ay mas malala pa,
Driver at kunduktor pag na-stop sa EDSA,
Bale wala la’t parang walang nakikita,
Nakapikit habang dinidilig ang goma!
Mga lalaking Pinoy kahit sa kalsada,
Ang hilig sa P.D.A. aking napupuna,
Not Public Display of Affection, ito’y iba!
Public Display of ARMAS o kanyang SANDATA!
At ‘yan ang PANGHESERYE natin sa kalsada!
At panghe-bi trapik na rin d’yan ay kasama!
Featuring rugby boys, snatchers at nagtitinda,
May ending pa kaya ‘tong mabantot na drama?!
Pwe! Pangheserye natin ay i-flush na muna,
Dito tayo sa KALYESERYE ng ligaya,
Syempre mga Dabarkads dito mga bida,
Madyidyingel ka rin pero sa katatawa!
Tutal pagdyingel naman in public ang topic,
Eh hindi na ako magpapatumpik-tumpik!
Waring ganon lang ako ay magpapatalsik,
Tungkol KALYESERYE naming nakaka-ADIK!
Nais kong ipagmalaki mga kasama —
Si Paolo, si Jose, si Wally at si Yaya,
Alam n’yo bang BAHALA NA aming istorya?
Lahat sila kanya-kanyang gawa ng linya!
Susi ng tagumpay pagdating sa comedy,
Bukod sa nakapagsusulat ka rin syempre,
Eh hindi lang magpatawa iyo pang keri
Kundi halakhak mo pa ri’y nakabibingi!
Sa pangunahing awitin para palabas,
“ISANG LIBO’T ISANG TUWA” ang nakaangkas,
Waring padakila la’t pangakong may angas
At pampaganda lang sa aming patalastas!
Tatlumpu’t anim na taon ang makalipas
At halos DALAWAMPU’T LIMANG LIBONG ORAS,
At KALYESERYE nag-umpisang ipalabas,
“Totoo pala s’ya!” aking naibulalas!
Totoo pala “isang libo’t isang tuwa!”
Nangyayari nga pala at... walang himala!
Sapagkat Ang Poet N’yo ‘yun ang napapala
Sa t’wing ang KALYESERYE na ay ginagawa!
Isang biyaya s’ya at swerteng masasabi —
Ang pangyayari sa amin ng KALYESERYE,
Kaya ngayong TRENTA’Y SYETE na binabyahe,
EAT BULAGA, ‘di lang may asim pa... may PANGHE!
- Latest
- Trending