Desisyon ni Tomas respetohon ni Davide

CEBU, Philippines – Si Gobernador Hilario Davide, III mipadayag nga angayan nga respetohon ang desisyon ni Mayor Tomas Osmeña nga dili iapil ang dakbayan sa Sugbo sa Metro Cebu Development and Coordinating Board (MCDCB).

Si Davide kinsa maoy chairman sa MCDCB nagkanayon nga hinuon kon adunay himuon ang board nga komunikasyon ilaha gihapon nga pahibaw-on ang dakbayan sa Sugbo.

Ang gobernador nagkanayon  nga posibleng adunay epekto sa giduso karon nga balaodnon ni Cebu City north district representative Raul del Mar sa pag-umol sa Mega Cebu Development Authority (MCDA) ang dili pag-apil sa dakbayan sa Sugbo.

Si Osmeña unang nagkanayon nga siya mopadala og sulat ngadto sa MCDCB aron i-formalize ang dili pag-apil sa Sugbo . Ang MCDCB usa kini ka coordinating body sa Metro Cebu alang sa pagplano ug kauswagan lakip na ang pag-sustain sa long-term projects sa tibuok Metro Cebu.

Kini gilangkuban sa 13 ka local government units sa dakbayan  sa Mandaue, Lapu-Lapu, Danao, Talisay, Carcar, Naga, ug Cebu City. Apil usab niini ang lungsod sa Consolacion, Liloan, Cordova, Minglanilla, Compostela, ug San Fernando. (/BDB)(BANAT NEWS)