Labing dakong hugna sa hinabang

Labing menos 80,000 ka pamilya ang nahatagan og hinabang sa mga boluntaryo gikan sa Sugbo nga nikuyog sa mga trak nga puno sa mga pagkaon ug tubig alang sa mga biktima sa linog sa Bohol. Sa usa lang ka biyahe, daghang salamat sa higanteng barge sa Primary Group of Companies ug sa 16 ka trucks ug buses sa local government units ug pribadong mga kompaniya ug indibiduwal, nahakot gikan sa ABS-CBN Broadcast Complex sa Jagobiao, Mandaue City ngadto sa kalungsoran ug kabaranggayan sa Bohol nga labing nagusbat sa linog.

Sud sa usa lang ka adlaw, tungod sa pagtinabangay sa mga Sugbuanon, naabot sa nagbuntaog nga mga hinabang ang mga biktima sa labing hilit nga kabaranggayan.

***

Mga nagtan-aw sa nasudnong telebisyon niadtong Miyerkules sa gabii natandog pag-ayo sa footage sa pagdunggo sa higanteng barge sa pantalan sa Tubigon ug ang sunudsunod nga pagkawas sa 16 ka trucks ug buses nga namungingi sa mga hinabang nga naglakip sa 80,000 ka food packs ug 112,000 ka botelya sa tubig.

Wa kaiban sa katalagsaon sa talan-awon nga naatol ang pagdunggo sa barge nga "Castor 6" sa kilumkilom, ang talagsaong bahin sa adlaw nga mag-ilog ang kahayag ug ang kangitngit. Bisan ang mga Bol-anon nga nag-atang sa pantalan wa kapugong sa pagpakpak sa pag-abot sa labing dakong hugna sa mga hinabang sukad sa linog sa niaging semana.

***

Gikan sa pantalan, nag-iyahay ang mga trak pag-adto sa ilang gitakdang mga destinasyon ug bisan ngitngit na nagdungan pagsugod pag-apud-apod sa mga hinabang sa evacuation centers nga ilang naagian. Maong dali rang nahuman sa way pagpaabot sa tabang sa lokal nga mga opisyal ug wa kahigayon ang mga politiko sa pagpanghilabot.

Timaan sa kadaghan sa mga pamilya nga nahatagan na sa mga hinabang sa mga Sugbuanon mao ang nagbaha nga text messages nga among nadawat gikan sa nagkalainlaing suok sa Bohol. Nga kaniadto nagreklamo nga wa pa maabti og hinabang apan karon puno na sa kamapasalamaton sa mga Sugbuanon.

***

Sunod namong gimbuhaton mao ang pagpabalik sa mga trak ug mga boluntaryo sa Sugbo. Karon pang Sabado mobalik ang barge nga ilang gisakyan paingon sa Bohol. Mosuway pagpanghangyo sa mga kompaniya sa barko kon mapasakay ba nila ang mga trak ug mga boluntaryo sa ilang mga biyahe gikan sa Tubigon.

Maayo na lang nga nisugot si Lucio Lim, Presidente sa Lite Shipping, nga librehon ang mga trak ug mga boluntaryo sa ilang biyahe balik sa Sugbo. Kinahanglan pa hinuon silang maghuwat nga may bakante pa ang mga barko dayong larga. Bugtong konsuylo mao nga di sama kapuno ang mga biyahe gikan sa Tubigon kay sa mga barko gikan sa Sugbo paingon sa Bohol nga kanunayng puno sa mga pasahero ug kargamento.

***

E-mail: [email protected]