EDITORYAL - Naglunop ang fake news

Nag-awas awas ang mga fake news, deep fakes, misinformation, disinformation karon sa social media tungatunga aning init kaayong isyu sa pagdakop kang kanhi presidente Rodrigo Duterte ug pagdala kaniya didto sa hawanan sa International Criminal Court (ICC) sa The Hague sa Netherlands.

Kaning mga posts naglakip sa mga inantigong paggamit sa teknolohiya aron maghimo og mga videos, pagkuha og mga videos gikan sa laing nasud ilabi na mga demonstrasyon sa mga tawo, hasta pud pagtuis sa mga tinuod nga gipangestorya sa mga individual nga target sa post.

Ang mga post karon sa social media sa Pilipinas mura og susama niadtong naghinangat ang 2016 elections nga diin nagbaha ang mga pagpangdaut sa kontra ug pagpahumot sa usa ka politiko o mga politiko ang mga unod sa posts.

Dunay nigawas nga post bahin sa usa ka kanhi polis nga nangangkong ni-resign siya sa serbisyo tungod sa nahitabo karon, apan nasuta nga sa wala pa nahitabo ning kasikas sa politika sa nasud hagbay ra siyang ni resign.

Laing post pa gyud mao nga si US President Donal Trump nitingog kuno batok sa ICC human siya nasayod nga gidakop si Duterte. Sa gihimong fact checking, walay bisan usa ka lehitimong US news outlets didto ang nakabalita og ingon niini.

Gawas pa niini, dunay kunoy dokumento nga gikan sa gobiyerno sa US nga nagmando sa US Seal Team nga luwason si Duterte gikan sa The Hague.

Ang mga ordinaryong kalihokan sa kapolisan ug militar nga gikuhaan og videos, gibutangan og captions nga mapanghagit ug nagsabwag og kahadlok sa katawhan bisan dili tinuod.

Apan ang makaalarma karon, dunay mga post nga gihimo og tuyo aron hagiton ang gobiyerno, mapangahas nga panawagan nga makamugna og kagubot ug kasamok sa katawhan.

Kaning mga nahitabo karon diha sa social media, dunay dili maayong epekto sa nasud ilabi na sa ekonomiya nga gisaligan sa kinabag-ang Pilipino.