Cebu nahagba na SAB sa MPBL

CEBU, Philippines — Ang Cebu Classic nakatilaw sa ikaduha nilang sagunson nga pilde human sila miyukbo ngadto sa 1Bataan Risers, 79-69, sa 7th Maharlika Pilipinas Basketball League (MPBL) season niadtong Huybes, Marso 20, didto sa Rizal Memorial Coliseum sa kaulohan.

Miposte pa unta ang Cebu og double-digit nga bentaha, 42-32, sa jump shot ni Rashawn McCarthy sa nahibilin nga  6:52 sa ikatulong  kuwarter.

Apan ang 1Bataan miresbak pinaagi sa nagkayong 19-6 rally aron kontrolahon ang duwa, 51-48, sa hingpit.

Human nakasikit ang Cebu, 50-51, sa duha ka free throws ni Jeco Bancale, ang Risers mitagak og makabungog nga 16-0 nga bomba aron inaton ang ilang labaw ngadto na sa 17 puntos, sa pinal nga 8:06 nga       marka.

Ang Cebu igo lamang napaduol ngadto sa nubye puntos, 66-75, sa katapusang dos minutos.

Sila si Jeff Santos ug Yves Sazon parehong mi-iskor og 12 puntos samtang si Robbi Marion Darang midugang og 11 puntos, walo ka rebounds ug lima ka assists aron tabangan ang 1Bataan pagkadlit sa una nilang daog human napakyas sa maigi nilang duha ka pagsuway.

Si Bancale mitapos uban ang 12 puntos, tulo ka rebounds ug tulo ka assists samtang si Dennis Gabriel Santos milansang og 11 puntos ug lima ka rebounds apan way nahimo kay ang Cebu nahisukamod na sab human sa impresibo nilang sinugdanan.

Si Mark Meneses mirehistro og double-double nga 10 puntos ug 10 ka rebounds uban ang duha ka assists ug duha ka steaks alang sa Cebu, nga mosuway pagbangon sa duha ka sunod-sunod nilang pagkadagma sa dihang ilang sangkaon ang San Juan Knights karong Lunes, Marso 24, didto sa Nueva Ecija Coliseum sa Palayan City.