Suns mibihag sa Cavs
CEBU, Philippines — Si Kevin Durant mipabuto og 42 puntos sa dihang gipahayagan sa Phoenix Suns ang ilang tsansa nga makasud sa playoffs human gibihag ang Cleveland Cavaliers, 123-112, sa NBA kagahapong adlawa didto sa PHX Arena sa Phoenix, Arizona.
Mangtas kaayo si Durant ilabi na sa ikatulog kuwarter diin siya mibubo og 19 puntos aron tabangan ang Suns pagpaburot sa ilang labaw ngadto sa 19 puntos, 98-79, nga nakapabarag sa Cavs sa nahibiling bahin sa duwa.
Sa laing makapakurat nga resulta, ang Detroit Pistons gipayaka sa Dallas Mavericks, 123-117.
Dako pa hinoon og puruhan ang Pistons nga makabira og awtomatik nga luna sa playoffs kay nagpabilin sila sa ikaunom nga puwesto sa East uban ang 39-32 nga baraha.
Didto sa Utah, sila si Kristaps Porzingis ug Jayson Tatum nagkumboya'g 53 puntos aron pangulohan ang Boston Celtics ngadto sa 121-99 nga demolisyon sa Jazz.
Samtang ang Oklahoma City Thunder nagselebrar sa ilang pagsilyo sa No.1 seed sa West pinaagi sa 141-106 nga paglampaso sa Charlotte Hornets.
Kay segurado na ang OKC sa numero unong puwesto bitbit ang 58-12 rekord, ang Houston Rockets mipalig-on sa ilang kampanya nga mopahiluna sa ikaduhang dapit human gibugha ang Miami Heat, 102-98, alang sa ikasiyam nilang sagunson nga daog.
Ang Minnesota Timberwolves padayong misikit sa Golden State Warriors sa karera alang sa playoffs human gibalhiboan ang New Orleans Pelicans, 134-93. Ang Wolves nagkupot na karon og 41-31 nga marka, ligas kaayo sa Warriors nga nagtangag og 41-29 nga baraha.
- Latest
