Cebu City kampiyon sa Duke Frasco Cup
CEBU, Philippines — Ang Team Cebu City nga gibandera ni Dondon Hontiveros nakaipsot sa host Liloan Tornadoes, 72-69, sa kulbahinam nilang final aron paglugwa nga kampiyon sa Cong. Duke Frasco Invitational Basketball Cup niadtong Sabado, Marso 22, didto sa Panphil B. Frasco Memorial Sports Complex sa Liloan, Cebu.
Si Hontiveros naka-iskor lamang og otso puntos apan ang krusyal niyang 3-pointer sa hilimatyong segundos nahimong yawi sa Cebu City pagkab-ot sa gihandum nilang korona.
Midiktar sa dagan sa duwa gikan sa sinugdanan, ang Cebu City miabante og otso puntos pagdung sa katapusang kuwarter apan ang Liloan madasigong mirebak aron pag-ilog og tres puntos nga labaw sa pinal nga tres minutos nga ilang gikuptan hangtud sa katapusang 53 segundos.
Miabot dayon ang pagkamabayanihon ni Hontiveros.
Ang Liloan duna pa untay tsansa nga kawaton ang daog apan si Joseph Cabahug nakahimo og turnover sa nahibilin nga 24 segundos.
Si Jaybie Mantilla mitali og 16 puntos samtang sila si Jeff Gudes ug RJ Dinolan nagkumbinar og 19 puntos alang sa Cebu City, nga mibulsa og P200,000 sa pagsakmit nila sa titulo sa tulo ka adlaw nga torneyo nga giorganisa nilang Liloan Councilor Kath Jumapao, Ian Callet sa Indie Sports ug Jover Pisao.
Nadoble ang kalipay ni Mantilla human siya gipasidunggan nga Finals MVP samtang ang teammates niyang sila si Dinolan, Miguel Gastador ug James Bryan Gomez naglangkob sa Mythical Five kauban silang Cabahug ug Lawrence Mangubat sa Liloan.
- Latest
