Boston Celtics gibaligya sa rekord nga kantidad
CEBU, Philippines — Sa laing makapakurat nga kasikas sa NBA, ang Boston Celtics gibaligya na ngadto sa usa ka kompanya nga toa magbase sa California sa rekord nga kantidad nga $6.1 billion.
Sigun sa usa ka opisyal nga pamahayag, ang Boston Basketball Partners LLC mikompirmar nga ang mga tag-iya sa Celtics nagkauyon nga ibaliya ang nabantog nga NBA team ngadto ni William Chisholm, ang managing director ug co-founder sa Symphony Technology Group.
"If approved, the new ownership group will buy a majority of the team this summer at an initial valuation of $6.1 billion," sigun pa sa Celtics management.
Mao kini ang labing dako nga kantidad nga gitanyag alang sa usa ka sports team didto sa Amerika. Nalabwan niini ang gibayad nga $6.05 billionsa dihaqng napalit ang NF team nga Washington Commanders niadtong 2023.
Ang pagbaligya sa defending NBA champion kinahanglan pa hinoon nga aprobahan sa NBA Board of Governors.
Ang Celtics usa sa labing gitamod nga prangkisa sa kasaysayan sa NBA uban ang rekord nga 18 ka titulo sa kampiyonato
Si Chisholm, nga lumad gikan sa Massachusetts, namahayag nga usa siya ka lunod patay nga fan sa Celtics sa tibuok niyang kinabuhi.
Gawas ni Chisholm, ang bag-ong grupo nga manag-iya sa Celtics naglangkob nilang Robert Hale; Bruce Beal Jr. ug Sixth Street. Si Hale usa sa mga kasamtangang tag-iya sa Celtics.
Ang pamilyang Grousbeck ug si Steve Pagliuca maoy nakapalit sa Celtics sa kantidad nga $360 million niadtong 2002.
Si Wyc Grousbeck magpadayon sa iyang papel isip CEO ug Governor sa Celtics hangtud sa 2027-28 season.
Ang Celtics maoy ikaupat nga NBA team nga gibaligya sa milabayng duha ka tuig. Niadtong 2023, napalit ang Phoenix Suns sa kantidad nga $4 billion ingon man ang Milwaukee Bucks ug Dallas Mavericks sa parehong presyo nga $3.5 billion.
- Latest
