Boxing legend George Foreman mipanaw
CEBU, Philippines — Si "Big" George Foreman, usa sa labing bangiitan ug tinamod nga personalidad sa kasaysayan sa boksing, nitaliwan na ngadto sa laing kalibutan kagahapong adlawa sa edad nga 76 anyos.
Sa mabulokon niyang karera nga milanat og tulo ka dekada, si Foreman nakadaog og Olympic gold medal niadtong 1968, nahimong heavyweight champion duha ka higayon, ug gibayaw sa Boxing Hall of Fame.
Natatak siya sa panumdoman sa mga fans sukad sa halandumon nga "Rumble in the Jungle" diin iyang nakasangka si Muhammad Ali niadtong 1974 didto sa Zaire.
Si Foreman nalangkatan sa iyang korona isip world champion human gibuntog ni Ali pinaagi sa 8th round TKO sa labing sikat nga away sa kasaysayan nga gihimoan pa gani og salida sa Hollywood ug nakasakmit og Oscar award.
Human sa iyang kapildihan ni Ali, si Foreman miaway pa lima ka higayon sa wala pa miretiro sa edad nga 28 anyos.
Napu ka tuig ang milabay, mibalik siya og boksing ug nakampiyon pa og usab human gipakamang si Michael Moorer niadtong 1994.
Sa edad nga 45 anyos ug 299 ka adlaw, si Foreman mirehistro og rekord isip labing tiguwang nga heavyweight champion.
Sa kinatibuk-an, si Foremanb mikulit og 76 ka daog, 68 niini pinaagi sa knockout, nga giatbangan og lima lamang ka pilde.
- Latest
