Green, Butler nangu sa Warriors batok sa Raptors

CEBU, Philippines — Si Draymond Green mikadlit og 21 puntos samtang si Jimmy Butler miposte og triple-double sa dihang ang Golden State Warriors nakalingkawas batok Toronto Raptors, 117-114, sa NBA kagahapong adlawa didto sa Chase Center sa San Francisco, California.

Dunay say pito ka rebounds, lima ka assists ug upat ka steals si Green samtang si Butler mipupo oig 16 puntos, 11 ka rebounds ug 12 ka assists alang sa Warriors nga nakamaneho pagpiog sa Raptors bisan og wala makatiwas og duwa ang alas nilang si Stephen Curry kay na-angol sa ikatulong kuwarter.

Dili hinoon sersoyo ang injury ni Curry ug makabalik ra dayon kini og salida sa korte.

Didto sa Los Angeles, ang Milwaukee Bucks namawi sa miagi nilang kaparotan batok sa Warriors pinaagi sa paglampaso sa Lakers, 118-89.

Kuwang hinoon kaayo og tawo ang Lakers nga miduwa nga wala ang tulo nila ka mga bitoon nga sila si LeBron James, Luka Doncic ug Austin Reaves kay nangayayay.

Si Giannis Antetokounmpo maoy nangu sa Bucks uban ang 28 puntos samtang si Gary Trent Jr. miamot og 23 puntos.

Ang anak ni LeBron nga si Bronny James ug Dalton Knecht mitali og 17 puntos matag usa alang sa Lakers. Si Bronny mipasud og pito sa 10 niya ka itsa dayon na ngadto sa pagrehistro sa labing unang double-digit nga puntos sa iyang karera.

Sa laing sangka, si Bennedict Mathurin miharos og 28 puntos ug 16 ka rebounds aron ituboy ang Indiana Pacers ngadto sa 105-99 nga kadaogan sud sa overtime batok sa Brooklyn Nets.

Si Myles Turner midonar og 23 puntos, 10 ka rebounds ug lima ka blocks alang sa Pacers, nga mipahayag sa ilang kampanya nga maka-angkon og awtomatik nga luna sa playoffs bitbit ang 40-29 rekord.

Didto sa Charlotte, ang Hornets mipayaka sa bisita nilang New York Knicks, 115-98.

Si LaMelo Ball mi-iskor og 25 puntos samtang si Miles Bridges mihipos og 15 puntos ug 10 ka rebounds alang sa Hornets nga mipakgang sa duha ka sagunson nilang pilde.

Sila si OG Anunoby ug Karl-Anthony Towns nagkumboya'g 49 puntos alang sa Knicks nga naapektuhan og maayo samtang wala ang bitoon nilang si Jalen Brunson kay napukan sila sa ikaunom nga higayon sa miagi nilang siyam ka duwa.