Pulis protektor ng POGO, binalaan ng PNP
MANILA, Philippines — Mapapatawan ng disciplinary action ang mga pulis na mapapatunayang protektor ng operasyon ng illegal POGOs (Philippine Offshore Gaming Operators) sa bansa.
Ito ang babala ni Philippine National Police (PNP) chief PGen. Rommel Francisco Marbil kasunod ng pagkakadiskubre ng mga POGO hubs sa Region 3.
“Integrity and accountability are the cornerstones of our public service. We remain committed to ensuring that our officers uphold these values,” ani Marbil.
Ayon kay Marbil, hindi dapat nasasangkot ang mga pulis sa anumang illegal activities.
Aniya, pinaigting nila ang kanilang monitoring at kampanya laban sa illegal POGOs na nagresulta ng matagumpay na police operations sa Bamban, Tarlac at Porac, Pampanga.
Dagdag pa ni Marbil, mino-monitor na rin nila ang iba pang mga probinsiya na mga operasyon ng POGO.
Matatandaang pinangunahan ng Criminal Investigation and Detection Group (CIDG) at Anti-Cybercrime Group (ACG) operasyon upang buwagin ang naglipanang POGO operations sa bansa.
Pinuri ni Marbil ang CIDG at ACG sa kanilang accomplishment na indikasyon na may sapat na kakayahan ang PNP na lumutas ng mga sensitibong kaso na kinasasangkutan ng mga sindikato.
Pagtitiyak ni Marbil, pananatilihin ng PNP ang peace and order sa iba’t ibang bahagi ng bansa.
- Latest
