Karambola sa manag-agaw, duha patay

CEBU, Philippines — Mibanaw ang dugo sa pagsugat sa Bag-ong Tuig sa mga hubog nga manag-igaw nga nag-unay og dinunggabay atol sa ilang panaglalis diha sa Sitio Puro, Barangay Lower Awihao, Toledo City niadtong Enero 1, 2024.

Parehong namatay sila si Catalino Ortega Canillo, nag-edad og 50 anyos ug ig-agaw nga si Alberto Canillo Sedon, 45, samtang ang suspek mao si Andres Ortega Canillo, 59,igsuon ni Catalino.

Ang kapuyo ni Catalino nga si Miraflor Manangkila kinsa nasamad sa tuhod ug tiil miingon nga gikan sila sa balay ni Andres nag-videoke pagsugat sa Bag-ong Tuig.

Apan human sa buto-buto nagkabikil ang manag-agaw nga Catalino ug Alberto tungod sa tablet ug cellphone. Nisangpot kini sa matud pa pagdunggab ni Alberto kang Catalino. Ang igsuon ni Catalino nga si Andres  mitabang unta apan napatay niini si Alberto.

Ang inahan ni Alberto mipasangil nga gisuyaan ang iyang anak sa managsuong Canillo.

Nadakpan ra dayon sa kapulisan ang suspej ug pasakaan kini og kasong homicide. Na-recover sa kapulisan gikan sa suspek ang kutsilyo ug sakuban niini apil na ang pecha korno nga dunay kutsilyo. (BANAT NEWS)