OCD: 32 patay, 8 milyon apektado ng habagat
MANILA, Philippines — Umabot na sa 32 katao ang nasawi dahil sa matinding epekto ng southwest monsoon o habagat, na nagdulot ng malawakang pagbaha at landslide sa iba’t ibang rehiyon ng bansa, ayon sa ulat ng Office of Civil Defense (OCD) nitong Sabado.
Batay sa update, naapektuhan na ang 2.3 milyong pamilya o kabuuang 8 milyong katao sa sampung rehiyon kabilang ang CAR, Ilocos, Cagayan Valley, Central Luzon, NCR, Calabarzon, Mimaropa, Bicol, Western Visayas, Eastern Visayas at Zamboanga Peninsula.
Sa tala ng OCD, 15 ang nasawi sa Benguet, tig-apat sa Rizal at Batangas, tig-dalawa sa Occidental Mindoro at Caloocan City, tig-isa sa La Union, Quezon, Oriental Mindoro at Negros Occidental, habang isa pa ang bineberipika. Karamihan ay biktima ng landslide, pagkalunod, rockslide, pagkakuryente at pagbagsak ng puno, dulot ng habagat at mga nagdaang bagyong Luis, Maymay at Neneng.
Nasa 19 katao ang sugatan at tatlo ang nawawala mula sa Quezon City, Batangas at Manila. Sa kasalukuyan, 297 lugar ang nananatiling lubog sa baha, karamihan sa Central Luzon, habang 281 lugar ang nasa panganib dahil sa lumambot na lupa.
Umabot na sa P6.11 bilyon ang pinsala sa imprastraktura at P2.32 bilyon sa agrikultura. Nakapamahagi na ang pamahalaan ng P1.65 bilyong ayuda, kabilang ang relief goods, sa mga naapektuhang pamilya.
- Latest
