DNA ng Pinay na naaresto sa pag-abandona ng bangkay sa Japan, tugma sa murder weapon

MANILA, Philippines — Nag-match sa murder weapon ang DNA ng isa sa dalawang Pilipino na iniimbestigahan sa pagkamatay ng mag-asawang Hapon sa Tokyo, Japan.

Ayon sa ulat, inaresto ang dalawa (isang lalaki at isang babae) dahil sa pag-abandona sa mga biktima na pinaslang sa kanilang bahay noong nakaraang Enero.

Batay sa impormasyon mula sa Tokyo Police, sinabi ng Department of Foreign Affairs (DFA) na ang DNA na naiwan sa murder weapon ay nagtugma sa hindi pinangalanang Filipino woman.

Inaasahang ilalabas kung ano ang ipapataw na kaso laban sa mga Filipino sa Marso 23 at 24.

Sa kabila nito, tiniyak ng Department of Foreign Affairs na patuloy nilang bibigyan ng legal na tulong ang dalawa.

Napaulat na sa isang CCTV footage nakita ang dalawang Pilipino na lumalabas sa bahay nina Norihiro at Kimi Takahashi, na natagpuang patay noong Enero 16, 2024.