Misis iniwan ni mister, nag-suicide

MANILA, Philippines - Dahil sa matinding depresyon matapos na abandonahin ng kaniyang mister, nag-suicide ang 45-anyos na misis matapos nitong martilyuhin ang sariling ulo bago tumungga ng lason sa bayan ng Altavas, Aklan kahapon ng madaling araw.

Kinilala ang nagpakamatay na biktima na si Marivic Alivio ng Brgy. Odiong, Altavas.

Sa pagsisiyasat, basag ang bao ng ulo ng biktima at may mga saksak sa katawan subalit ang higit na tumapos sa kanyang buhay ay ang pesticide na ininom nito.

Sa teorya ng pulisya, isinagawa ng biktima ang pagpapakamatay sa pagitan ng alas-2 hanggang alas-5 ng madaling-araw kung saan natagpuan ang bangkay nito bandang alas-7 ng umaga sa loob ng kanilang tahanan.

Lumalabas sa imbestigasyon na umalis ang mister ni Alivio at nagtungo sa Maynila upang maghanap ng trabaho ilang buwan na ang nakalipas subalit simula noon ay hindi na ito nakipagkomunikasyon sa biktima.

Palaging tulala ang biktima na hinihintay na mag-text man lamang ang kaniyang mister hanggang sa tuluyan na itong panawan ng pag-asa hanggang sa kusa itong nagpasalubong kay kamatayan.