SMI malaking tulong sa Cotabato residents

GENERAL SANTOS CITY, Philippines - Hindi pa man naisasa­katuparan ni Pangulong Aquino ang kanyang Public­-Private Partnership (PPP) projects ay nailunsad na ito ni Tampakan, South Cotobato Mayor Leonardo Escobillo sa kanyang bayan sa tulong ng Sagitarius Mines Inc. (SMI).

Sinabi ni Mayor Escobillo, naisulong niya ang subsidy ng LGU sa edukasyon mula pre-school hanggang high school sa tulong ng SMI gayundin ang paglulusad ng health care sa mga residente kung saan ay hindi lamang libre ang konsulta sa doctor kundi pati ang gamot.

Wika pa ng alkalde, nagkaroon din sila ng training programs sa pakikipagtulungan ng TESDA para sa carpentry, masonry at plumbing kung saan ang unang batch nito ay nakapagtapos na at may nakahanda agad silang mga employer.

Sinabi pa ni Mayor Escobillo sa 2nd batch nito ay mag-aalok naman sila ng welding program,  practical electricity bilang paghahanda sa full operations ng Tampakan Gold-Copper project ng SMI.

Idinagdag pa ng alkalde na inaasahan niyang makakamit niya ang kanyang vision na zero unemployment sa susunod na 5 taon sa sandaling magsimula na ang mining project ng SMI kung saan ay maraming manggagawa ang kanilang kukunin sa proyekto.