Presyo ng langis bababa lang kung mahuhuli na si Gadhafi

MANILA, Philippines - Hanggat hindi umano nahuhuli si Libyan President Muammar Gadhafi ay hindi maiibsan ang problema sa pagtaas ng presyo ng petrolyo sa mga susunod na linggo.

Sinabi ni Energy Undersecretary Jose Layug na pataas pa umano ang “trend” sa presyuhan ng langis sa pandaigdigang merkado taliwas sa inaasahan ng ilang eksperto na bababa na ito dahil sa pagkakatalsik sa pu­westo kay Gaddafi.

Mas mataas ang pres­yo ng langis ngayong linggo kumpara nitong lu­mipas na linggo ngunit umaasa sila sa posibilidad na mag-flat o huminto ito upang hindi labis na maapektuhan ang presyo ng lokal na petrolyo sa bansa.

Ipinaliwanag ni Layug na nangyari na ang biglaang pagbaba ng presyo ng langis sa internasyunal na merkado noon nang mapaslang ng puwersa ng Estados Unidos ang kilabot na terorista na si Osama Bin Laden at pagkakaaresto kay dating Iraq President Saddam Hussein.

Itinanggi naman ni Layug ang akusasyon ng mga militanteng grupo ng sabwatan nila sa mga kumpanya ng langis makaraang paratangan na sila mismo ang nag-eengganyo sa oil hike sa maagang pag-aanunsyo ng pagtaas ng langis.

Iginiit nito na inihaha­yag lamang nila ang kom­putasyon nila base sa ling­guhang presyuhan ng gasolina sa international market upang ma­kapaghanda ang mga motorista.