Paniningil ng miscellaneous fees rerendahan

MANILA, Philippines - Tiniyak kahapon ng Commission on Higher Education (CHED) na hindi na papayagan ang paniningil ng mga kuwestiyunableng miscellaneous fees ng mga unibersidad at kolehiyo sa bansa.

Inimbestigahan kaha­pon ng Senate committee on education, arts and culture ang reklamo ng mga magulang sa hindi umano makatuwirang paniningil ng kung anu-anong miscellaneous fees katulad ng  band fee,  resumè printing fee, at maging thesis.

Ayon kay Kabataan party-list Rep. Raymond Palatino, hindi makataru­ngan at kaduda-duda ang mga nasabing fees na hindi nasisilip ng CHED.

Kaugnay nito, sinabi ni  CHED Executive Director Julito Vitriolo na bumalangkas na sila ng regulasyon o framework upang mamonitor ang mga kuwestiyonableng miscellaneous fee na inirereklamo ng mga ma­gulang at estudyante.

“Under sa binaba­ langkas na regulasyon o framework, siguro magkakaroon ng pro­seso ng monitoring at saka reporting para makita natin, mapag-aralan kung legitimate ba ang fees na ito,” sabi ni  Vitriolo.

Sa binabalangkas umano nilang regulasyon, sampung item na lamang ang maituturing na miscellaneous fees, kabilang na dito ang re­gistration, medical and dental, athletic fees, library fee at iba pa.

Pag-aaralan pa rin umano kung papayagang singilin sa mga  estudyante ang ‘aircon fee’ para sa mga paaralan na may air-conditioned classrooms.

Sinabi ni Vitriolo na ang ibang miscellaneous fee na wala namang ki­nalaman sa pag-aaral ng estudyante ay kanilang ipatatanggal.

Ayon kay Vitriolo, ang mga magulang at estudyante ay maaring tu­mawag sa telephone number 4411216 kung may reklamo sila sa mga hindi makatuwiran na miscellaneous fees.