Truth Commission buwagin

MANILA, Philippines - Dapat umanong buwagin na ang Truth Commission dahilan inutil ito sa kawalang kapangyarihang umusig at magparusa laban sa mga tiwali sa pamahalaan.

Ito ang ginawang pagbatikos kahapon ng ‘whistle-blowers group’ sa pangunguna ni Sandra Cam na nanawagan sa Kongreso na magpasa ng batas na lilikha sa isang komis­yong may kakayahang magpairal ng pangil ng batas na uusig at magpapakulong sa mga lider ng gobyerno na gumagawa ng matitin­ding katiwalian at pang-aabuso sa karapatang pantao sa ilalim ng ka­nilang panunungkulan.

“Sa halip na yang Truth Commission na nilikha sa pamamagitan ng Executive Order No. 1 ni Pangulong Benigno Aquino III ay dapat na isang totoong Truth Commission ang likhain na tunay na tutugon sa panawagan ng tao na usigin at parusahan ang mga opis­yal na nagkasala sa panahon ng kanilang panunungkulan,” giit pa nito.

Ayon sa spokesperson ng Whistleblowers Group, wala silang tiwala sa Truth Commission na pina­ngunahan ni dating Supreme Court Justice Hilario Davide sapagkat kaduda-duda umano ang pagkatao ng dating mahistrado dahil nakinabang ito noong panahon ni da­ting Pangulong Gloria Macapagal Arroyo.

Idinagdag nito na sayang lang ang pera, panahon at resources ng gobyerno sa Davide Truth Commission kaya dapat lang itong mabuwag na.