'Morong 43' kinasuhan

MANILA, Philippines - Sinampahan na kahapon ng kasong kriminal ng pama­ha­laan ang binan­sa­gang Morong 43 na mga pinaghihinalaang mi­yembro ng New Peo­ple’s Army at na­sa­kote habang nagsa­­sa­gawa ng training sa isang pribadong compound sa lalawigan ng Rizal noong Pebrero 6.

Sa isang pulong-balitaan, sinabi ni Chief Major Gen. Jorge Se­­govia ng 2nd IB ng Phi­lippine Army na ang 43 NPA rebel kabilang ang kanilang mga lider ay sinam­pahan ng kasong illegal possession of firearms at ammunitions sa korte ng Morong.

Kasabay nito, pina­bulaanan ni Se­govia na tinor­ture ng militar ang mga nasa­koteng rebel­de upang umamin ang mga itong miyem­bro at lider ng NPA tulad ng alegasyon ng kanilang mga pa­milya.

Pinanindigan niya na lehitimo ang ope­ras­yon na bumatay sa arrest warrant na ipi-na­labas ni Executive Judge Cesar Mangro­bang ng Regional Trial Court Branch 22 sa Imus, Cavite.

Kabilang sa 43 na­aresto ay mga doktor at rural health workers na nakumpiskahan rin ng mga eksplosibo.

Itinanggi rin ni Se­govia ang mga para­tang ng mga militan­teng grupo at ng ilang pamilya ng mga nasa­kote na ‘planted’ ang mga nasamsam na ebidensya.

Aniya, lumang tug­tugin na ang paninira ng CPP-NPA sa militar bilang bahagi ng ‘black propaganda’ ng mga ito.

Magugunita na si­na­la­kay ng pinagsanib na elemento ng militar at pulisya ang rest­house ng isang Dra. Melicia Valmonte sa E.de la Paz St., Brgy. Maybangkal, Morong.

Nasamsam mula sa pag-iingat ng mga ito ang ilang baril, gra­nada at ibang pampa­sabog.