Panawagan ni Cardinal Rosales: Deboto maging simple

MANILA, Philippines - “Sobra-sobra” na ang debosyon ng mga ma­nanampalataya sa Po­ong Nazareno.

Ito ang inamin kaha­pon ni Manila Archbishop Gaudencio Cardinal Ro­sales kaugnay sa nasak­sihang paggigit­gitan ng mga deboto sa prusisyon ng imahe ng Nazareno nitong Sabado sa May­nila na nagresulta sa pag­kamatay ng dala­wang katao at pagkaka­sugat ng daan-daan pang mananampalataya.

Ayon kay Rosales, ang sobra-sobrang debo­s­yon ang ilan sa mga “mali” sa pananampa­lataya na nangangaila­ngan ng pagbabago o paglilinis.

Sinabi ng Cardinal na nagkakaroon ng prob­lema sa debosyon dahil sa pagiging emosyonal ng mga deboto.

 Ayon kay Rosales, kapag labis na tumaas ang emosyon ay nababa­lewala na ang rason, gayundin ang kabanalan ng kapistahan ng patron, at ang debosyon.

Sinabi ng Cardinal na mainam naman ang de­bosyon ngunit ang pag­kasayang ng buhay at pagkakasakitan ng mga taong sumasama sa pru­sisyon ay taliwas aniya sa tunay na layunin ng pagdiriwang.

 Iginiit din ni Rosales na isa pang labis na de­bosyon ay kung ang pa­ nanampalataya ay gina­gawa ng isang de­boto para sa kaniyang sa­riling kapakanan la­mang.

Inamin rin nito na maraming bagay na dapat na linisin maging sa mga bagay na pang-relihiyon lalo na’t sobra-sobra ito.

Kaugnay nito, muling nanawagan si Rosales sa mga deboto ng Poong Nazareno na maging simple lamang at huwag maging makasarili na siya aniyang nais na ibahagi ng Black Naza­rene sa tao at siya ani­yang tunay na debosyon. (Mer Layson)