BNPP bill matutulad sa constituent assembly
MANILA, Philippines - Nagpahayag ng pangamba ang grupong “No To BNPP revival” na mai-railroad dito ng Kamara ang kinatatakutan nilang panukala ni Pangasinan Rep. Mark Cojuangco na naglalayong i-operate ang matagal nang nakatenggang Bataan Nuclear Power Plant.
Sinabi ni Dr. Giovanni Tapang, spokesman ng naturang grupo na isang malaking pagkakamali ng mga kongresista kung ang House bill 6300 ni Cojuangco ay matutulad sa Con-Ass resolution na iniratsada ng Kamara.
Ayon kay Tapang, dapat na matulad sa BNPP na nakatiwangwang at inaaalikabok na lamang ang panukala ni Cojuangco dahil bukod sa hindi ito sagot sa inaasahang kakulangan sa suplay ng Kuryente sa 2012 ay mapanganib ito para sa publiko.
Sayang din lamang umano ang P100 Milyon na inilaan nito sa pag-aaral lamang kung ligtas ang BNPP na i-operate sa kabila na deka-dekada ng pagkakasara nito.
Mas mabuti umanong gamitin na lamang ang salaping ito para sa pagdevelop ng ibang energy sources mula sa likas na yaman ng bansa. (Angie dela Cruz)
- Latest
- Trending
