Mga 'taong-gala' bibigyan ng tirahan, trabaho ng MMDA

MANILA, Philippines - Ire-rescue at bibigyan na ng trabaho ng Metropolitan Manila Development Authority (MMDA) ang lahat ng mga “taong-gala” o street dwellers pati na ang mga pamilya ng mga ito na pagala-gala at walang matinong ti­rahan sa Kalakhang May­nila.

Sa katunayan, ayon kay MMDA Chairman Bayani Fernando, may walong “taong-gala” na kasama ng kanilang mga pamilya ang ini-rescue ng kaniyang tanggapan saka dinala sa Jose Fabella Center sa Mandaluyong.

Ayon pa kay Fernan­do, hindi lamang tirahan, pagkain at malinis na damit ang ibibigay ng MMDA sa mga mare-rescue nilang mga “taong-gala” kundi bibigyan din ang mga ito ng trabaho sa ahensiya.

Sinabi pa ni Fernando na ang lahat ng mga “taong-gala” na kanilang na-rescue ay binigyan niya ng trabaho bilang kaminero at laborers ng MMDA.

Kabilang naman sa mga “taong-gala” na na-rescue ni Fernando at na­bigyan na ng kaukulang trabaho sa MMDA si Je­rome Vacongay, misis nito kasama ang pito nilang anak.

Si Vacongay ay isa sa walong “taong-gala” ka­sa­ma ng kanilang pamilya na sinagip ng MMDA sa kahabaan ng R-10 road sa Tondo, Maynila. (Rose Tamayo-Tesoro)