Dutchman na nanggulpi ng Pinay partner pinadampot ni Libanan

MANILA, Philippines - Inaresto ng Bureau of Immigration (BI) ang isang Dutch national na una nang inireklamo ng kani­yang Pinay na asawa, dahil sa ilang ulit na pag­dadala ng kaniyang mga babae mismo sa kanilang tahanan.

Ayon kay BI Commissioner Marcelino Libanan, maliban sa harapang pam­bababae ni Edzart Pieter Jan Zwaal, 68-anyos, mi­namaltrato at sinasaktan din nito ang asawa.

Batay sa affidavit ng asawa ng dayuhan, ma­higit dalawang taon na siyang nakararanas ng pang-aabuso mula sa asawa.

Nakilala umano niya si Zwaal sa Netherlands kung saan nagtrabaho ang Pinay bilang domestic helper sa loob ng 14 na taon.

Naging mag-live in partner umano sila ng da­yuhan simula pa noong March 2006.

Ayon sa reklamo, ma­dalas umanong magdala ng prostitute ang dayuhan sa kanilang sariling pama­mahay.

May pagkakataon pa umanong pinaaalis ng da­yuhan ang anak ng Pinay sa kaniyang unang asawa, para lamang magamit ang kwarto nito kasama ang kaniyang mga babae.

Ayon pa sa biktima, alcoholic ang naturang da­yuhan at lagi siyang binu­bugbog tuwing uuwi ng lasing.

Si Zwaal ay inireklamo na ng kasong paglabag sa anti-violence against women act sa pulisya ng Sta. Rosa, Laguna.

Ito ay kaugnay ng insi­denteng naganap noong Sept. 2007, kung saan paulit-ulit umanong sinun­tok ng dayuhan ang Pinay na asawa, kinaladkad pa­la­bas ng asawa at tinakot na siya ay papatayin. (Gemma Amargo-Garcia)