Gobyerno nakipagsabwatan sa kalabang mall ng GOTESCO

MANILA, Philippines - Pumalag kahapon ang korporasyong namama­ lakad sa GOTESCO at inakusahan ang gobyerno na nakikipagsabwatan sa kalaban nilang mall na naging dahilan para sam­samin ng pamahalaang lokal ang kontrobersyal na GOTESCO Grand Central Mall sa Caloocan City.

Ayon kay Atty. Trixie Angeles, tagapagsalita ng Gotesco, kinuha ng pama­halaang-lokal ng Caloocan ang kanilang mall para pa­boran ang Victory Mall na pag-aari ng alkalde ng lun­sod na si Recom Echiverri.

Sinabi ni Angeles na marami sa mga residente ng Caloocan ang nanini­wala na ‘business rivalry’ ang isa sa mga dahilan sa tangka ng pamahalaang lokal na samsamin ang Gotesco mall.

Idinagdag niya na ang Victory Mall ang makikina­bang sa pagsara o pagka­balam ng operasyon ng Gotesco.

Pinabulaanan ni Angeles ang akusasyon ng pamahalaang lokal na may utang na P722.3 milyong real property tax ang kani­lang mall.

Iginiit ni Angeles na nakuha ng Gotesco ang titulo sa loteng pinagtayuan ng mall noong Sept. 19, 2008. Dahil dito ay walang karapatang legal ang Ca­loocan na patawan ang Gotesco ng real property taxes sa huling 23 taon na aabot sa P722.3 million na gustong masingil ng Ca­loocan.

Sinabi ng Gotesco na umuupa lamang ito sa Caloocan sa naturang lote hanggang sa ito’y tuluyan nang ipagbili noong September sa Gotesco. Ang bilihan ay na-finalized sa isang memorandum of agreement (MOA) sa pagi­tan ng Gotesco at Caloo­can, at ang presyo ay itinali sa P182,085,078. (Ludy Bermudo)