Ina ni Erap lumulubha

Lumalala na ang ka­ram­daman ng 102 taong gulang na ina ni dating Pangulong Joseph Estra­da  na si Doña Mary Ejer­cito.

Ito ang kinumpirma kahapon ng kanyang duktor na si Dr. Lorenzo Hocson na nagsabing, sa isang buwang pagkakara­tay ni Doña Mary sa San Juan Medical Center, hindi na rumeresponde ang katawan nito sa mga gamot at hindi na bumuti ang kalagayan nito sa nagdaang mga linggo.

Kaugnay nito, muling dinalaw kahapon ni Estra­da si Doña Mary sa ospital at nanawagan siya sa publiko na ipagdasal na payagan siya ng Sandi­ganbayan na masilip ang kanyang ina nang mas ma­tagal sa nalalabing mga sandali ng buhay nito. 

Dahil sa edad ni Doña Mary ay hindi na nito kaya pa ang isa pang operas­yon. ‘Mahirap kalaban ang edad at hindi niya kakayanin ang isa pang operasyon sa kalagayan niya ngayon,” dagdag pa ng doktor.

Inamin din ni Hocson na nitong mga nakaraang araw ay nahihirapan nang huminga ang ma­tan­da at tanging ang breathing machine lang katulad ng ventilator at windpipe ang tumutulong dito.

Bukod dito ay madalas na ring nilalagnat si Doña Mary kaya kinakailangan din ito ng antibiotic. (Edwin Balasa)