‘Pagmamahal sa ama, di pera ang habol namin’

 “Pagmamahal sa ama at hindi pagtatangka sa kayamanan nito gaya ng sulsol ng mga nasa paligid ni Mark Jimenez (a.k.a. Mario Batacan Crespo) ang dahilan ng pag­hahain ng isang petisyon sa isang korte upang magta­laga ng isang guardian sa dating kongresista.”

Ito ang mariing nili­naw ng mga anak ni Jimenez hing­gil sa patutsada ng kampo nito sa pangu­nguna ng abugado nitong si Frank Chavez na pera lang ang habol ng mga ito kaya inihain ang nasa­bing petis­ yon sa Taguig City Court.

Magugunitang ini­ha­yag ni Chavez na nais lamang ng mga anak ni Jimenez ang kayamanan nito kung kaya’t naghain ito ng petisyon sa korte na agad na bigyan ng guardian ang dating kon­gresista.

Sa kanilang 13-pahi­nang petisyon na inihain nina Virgilio Crespo at Ma. Carolina Fah, nais nitong italaga ng korte si Ma. Aleli Pansacola bilang legal guardian ng kanilang ama.

Si Pensacola ang unang asawa ni Jimenez kung saan may pito itong anak. Si Carol Casta­neda naman ang live-in partner ni Jimenez na naghain ng isang petis­yon para sa isang temporary protection laban dito.

Inihalintulad naman ni Crespo si Pensacola na siyang “pinakabalanse” sa lahat at makakapag-alaga kay Jimenez.

Ayon kay Crespo, ang kanilang inihain na pe­tisyon para sa guardianship ay may kinalaman lamang sa personalidad at pagkatao ni Jimenez at hindi kasama ang anu­mang may kinalaman sa estate at properties ng da­ting kongresista.

Humiling rin ng pang-unawa ang mga anak ni Jimenez na anila ay isang matinding pagsu­bok ang kanilang dinada­anan ngayon.

Humingi na rin ng dis­pensa ang mga anak ni Jimenez sa mga ma­aring nasagasaan ng ka­nilang ama. (Edwin Balasa)