Bebeng palabas na ng bansa
Bagamat patuloy pa ring humuhugot ng lakas ay kumikilos na palabas ng bansa ang bagyong Bebeng.
Batay sa weather bulletin na inilabas ng Philippine Atmospheric Geophysical Astronomical Services Administration (PAGASA) dakong alas-10 ng umaga ay namataan ang sentro ng bagyo sa 470 kilometro Silangan ng Basco, Batanes dala ang lakas ng hangin na umaabot sa 160 kilometro bawat oras at bugsong aabot naman sa 195 kph.
Bukas ng umaga, inaasahang mararating ni Bebeng ang 700 km ng Hilagang silangan ng Basco, Batanes na halos sakop na ng Okinawa, Southern Japan.
Tiniyak din ng PAGASA na bagamat palabas na ng bansa ay patuloy itong magdadala ng kalat-kalat na pag-ulan sa iba’t ibang panig ng bansa partikular na sa kanlurang bahagi ng Timog Luzon at Visayas. (Angie dela Cruz)
- Latest
- Trending
