Magdalo nagbanta vs Arroyo government

Handa ang mga sundalo at pulis sa banta ng mga puganteng Magdalo na maglulunsad muli ng mga pagkilos laban sa Arroyo administration.

Ito ay kasunod ng matapang na pahayag kamakalawa sa TV ni 1st Lt. Sonny Sarmiento na sa mga susunod na araw ay ipapaalam nila sa taumbayan na buhay pa ang kanilang ipinaglalaban.

Ayon kay AFP spokesman Major Gen. Jose Angel Honrado, nag-iingay lamang ang grupo ni Sarmiento subalit wala ang mga itong kapabilidad para pabagsakin ang gobyerno.

Nagbanta pa si Sarmiento na sa loob ng 1,000 araw ay babaguhin ng MKP ang liderato sa gobyerno maging ang mga sangay ng pamahalaan. "We have a time frame. In the first 1,000 days, we will overhaul all branches of government to give way to a new order which will be for the people," ayon pa kay Sarmiento.

Base sa nakalap na dokumento, isasagawa ang mga pagkilos sa Mayo 1. (Lilia Tolentino/Joy Cantos)