Cabinet revamp tiniyak

Tiniyak kahapon ni Executive Secretary Eduardo Ermita na magkakaroon ng balasahan sa Gabinete ni Pangulong Gloria Macapagal-Arroyo sa linggong ito.

Sinabi ni Sec. Ermita, hindi naman malawakan ang gagawing pagbalasa ni Pangulong Arroyo sa kanyang Gabinete.

"Mag-abang tayo sa mga darating na araw, maaaring matapos itong weekend magkaroon tayo ng announcement," wika pa ni Ermita sa panayam ng DZMM.

Itinalaga na kahapon ni Pangulong Arroyo si dating Presidential adviser for Mindanao affairs Jesus Dureza bilang kapalit ni Rene Sarmiento sa pagiging Presidential adviser for peace process.

Wala pang itinalaga ang Pangulo na kapalit ni Dureza habang wala pang ibinibigay na bagong posisyon kay Sarmiento.

Ipinaliwanag pa ng executive secretary, pawang espikulasyon lamang ang mga nalathalang balita na kabilang sa maaapektuhan ng balasahan sa Gabinete ay sina DILG Sec. Angelo Reyes at DENR Sec. Mike Defensor.

Magugunita na kamakalawa lamang ay nag-anunsiyo si PGMA kung saan ay itinalaga niyang PCGG chairman si dating Sandiganbayan Justice Narciso Nario at si Gaudencio Mendoza bilang undersecretary ng Finance. (Lilia Tolentino)