Mining industry pinapata ng DENR -Solon

Inakusahan kahapon ng isang mambabatas si Environment and Natural Resources Sec. Elisea Gozun dahil ito umano ang nagiging dahilan upang mamatay ang local mining industry.

Ayon kay Leyte Rep. Aniceto Saludo, marami nang foreign investors ang umalis sa bansa dahil sa anti-business policy ng DENR.

Naniniwala ang solon na malaki ang maitutulong sa ekonomiya ng bansa kung uunlad ang local mining industry.

Maging si Pangulong Arroyo aniya ay naniniwala na isa sa pag-asa ng ekonomiya ng Pilipinas ay ang pampalakas sa industriya ng pagmimina.

"In fact, mining has been included in the 2003 Investment Priorities Program (IPP) by the National Economic Development Authority (NEDA)," ani Saludo.

Naniniwala din ang solon na hindi kontrolado ni Gozun ang DENR dahil mas makapangyarihan umano dito ang Mines Adjudication Board (MAB) na hindi napapalitan sa nakalipas na tatlong administrasyon.

"These people are so entrenched that they are virtually untouchable," ani Saludo.

Hindi rin umano kayang sugpuin ni Gozun ang nangyayaring katiwalian sa DENR.

Hanggat nakaupo aniya ang kalihim sa DENR ay hindi uunlad ang pagmimina sa bansa. (Ulat ni Malou Rongalerios)