Zuño matunog bilang Ombudsman

Nagiging matunog ang pangalan ni Department of Justice (DOJ) Chief Prosecutor Jovencito Zuño bilang mauupong Ombudsman makaraang pangunahan nito ang listahan ng mga pangalang isinumite kahapon ng Judicial and bar Council (JBC) sa Malacañang matapos ang isinagawa nitong public hearings.

Ayon kay Senator Francis Pangilinan, miyembro ng JBC kabilang sa mga isinumiteng pangalan na pagpipilian sa posisyon ng Ombudsman ay sina Solicitor General Simeon at Social Security Commission Chairman Bernardino Abes habang bumagsak naman sa ikaapat na puwesto si Presidential Commission on Good Government (PCGG) Chairman na si Haydee Yorac.

"Choosing the right person for the job as Ombudsman is crucial and this is another litmus test to President Arroyo’s leadership and her uttered resolve to build a strong republic," wika ni Pangilinan.

Ipinaliwanag ni Pangilinan ang aktibong partisipasyon ng publiko sa isinagawang mga public hearings ng JBC ay malaking tulong kaugnay sa pagpili ng magiging nominado sa Ombudsman.

Nasa Malacañang na ngayon ang pagpapasya kung sino sa tatlong nominado ang susunod na Ombudsman at papalit kay Acting Ombudsman Margarito Gervacio Jr. (Ulat ni Rudy Andal)