Undocumented Pinoys sa Malaysia sapilitang umuwi

Napilitang umarkila ng fishing vessel ang may 173 undocumented Pinoy sa bansang Malaysia para makauwi sa Pilipinas dahil umano sa mahigpit na pagpapatupad ng batas dito.

Ito ang ibununyag kahapon ng Department of Foreign Affairs dahil sa pagsagip sa kanila ng Philippine Navy habang sakay ng isang sasakyang pang-isda na may kapasidad lamang na 30 katao ang dapat maging pasahero.

Ang FB Hamila na sinakyan ng mga Pinoy deportees ay luma at wala pang ilaw kaya nalagay sa peligro ang buhay ng mga ito habang naglalayag sa dagat.

Nabatid na nagbigay lamang ng isang buwang palugit ang pamahalaang Malaysia noong nakalipas na linggo para sa pagdedeport sa may 60,000 undocumented Filipino na bumalik sa bansa.

Ang sapilitang pag-uwi ng mga Filipino sa nasabing bansa ay bunsod sa takot na maaresto dahil sa pagpapatupad ng kanilang immigration law na ang sinumang illegal na dayuhan na mahuhuli ay pagmumultahin ng P 5,000 bukod pa sa pagkulong ng anim na buwan at anim na hataw ng baston. (Ulat ni Ellen Fernando)