GMA baka ma-impeach pag kampo ng MILF ibinalik

Posibleng maharap sa impeachment si Pangulong Arroyo sa sandaling ibalik nito ang Camp Abubakar at 40 iba pang mga kampo sa Moro Islamic Liberation Front (MILF) gaya ng nakasaad sa nilagdaang kasunduan sa Kuala Lumpur, Malaysia noong nakaraang May 7.

Sinabi ni Senator Blas Ople, chairman ng Senate committee on foreign affairs, maituturing na treason o pagtataksil sa bayan sakaling ipatupad ni Pangulong Arroyo ang pagbabalik ng mga kampo militar sa MILF.

Ipinaalala ni Ople na mahigit 500 sundalo ang nasawi dahil sa pakikipaglaban para makuha lamang ang mga kampo militar na ito sa MILF matapos iutos ni dating Pangulong Estrada ang all-out war laban sa mga rebelde ng Mindanao.

Ipinaliwanag pa ng mambabatas, ang kaso ng treason ay isang capital offense at isang ground para mapatalsik ang Pangulo. (Rudy Andal)