Celtics giusban ang Mavs

CEBU, Philippines — Ang Boston Celtics mipayaka og usab sa Dallas Mavericks,  105-98, aron pagposte og 2-0 nga bentaha sa best-of-seven NBA Finals kagahapon didto a TD Garden sa Boston, Massachusetts.

Ning higayona, si Jrue Holiday maoy nangu sa Celtics bitbit ang 26 puntos, 11 ka rebounds, ug tulo ka assists.

Wala sab hinoon magpabitin sila si Jaylen Brown ug Jayson Tatum nga nagkumboya'g 39 puntos, 13 ka rebounds, ug 19 ka assists alang sa Celtics, nga dali nakabawi gikan sa mabugnaw nga sinugdanan.

Luyo sa pagpanginit ni Luka Doncic, ang Mavs mi-abante og tres puntos, 28-25, human sa unang kuwarter.

Apan miresbak sab dayon sa Celtics aron ilogon ang labaw, 54-51, sa halftime.

Misamot pa ang kainit sa Celtics sa ikatulong kuwarter aron inaton ang ilang bentaha ngadto sa 13 puntos.

Ang Mavs igo lamang nakasikit ngadto sa sayes puntos gumikan kay si Payton Pritchard milansang og buzzer-beater nga 3-pointer aron inaton og balik ang labaw sa Celtics ngadto sa 83-74. Wala na sila molingi pa sukad niadto.

Dako sab og naambag si Kristaps Porzingis nga mihipos og 12 puntos, upat ka rebounds, usa ka assist, ug duha ka blocks alang sa Celtics.

Si Doncic mikolekta og triple-double nga 32 puntos, 11 ka rebounds, ug 11 ka assists apan nakawang ang iyang  paningkamot a habig sa Mavs.

Si Kyrie Irving nalimitahan na sab ngadto lamang sa 16 puntos, duha ka assists, ug unom ka rebounds, samtang sila sa P.J. Washington, Daniel Gafford, ug Derrick Jones, Jr. nagkumbinar og 41 puntos ug 19 ka rebounds sa pilderong kawsa.

Ang Mavs naghinaut nga mabawos sa ilang pag-host sa Game 3 karong Huwebes, Hunyo 13 (oras dinhi sa Pilipinas). (BANAT NEWS)