Playing Safe

Gisaway na usab ni Cebu City Vice Mayor Tomas Osmeña ang mayor sa siyudad kay sige lang kuno’g “playing safe” sa iyang kaugalingon.

Husto baya si Tomas kay nakita man gud niya nga si Mayor Nestor Archival abtik kaayo nga makapanghunaw, susama sa gihimo ni Poncio Pilato kaniadto ba, kon dunay matan-aw niyang sayop sa iyang mga sakop.

Karong bag-o na lang, nangagpas ang mga sakop sa Cebu City Transportation Office (CCTO) nga si Ombudsman Boying Remulla moanha sa T. Padilla Creek aron pagsusi sa flood control project sa DPWH.

Nabalaka tingali ang mga opisyal sa CCTO nga basin og makamugna kini og kahasol sa trapiko kay daghan man gyud ang mokuyog ni Remulla, aw gi-close sa traffic ang T. Padilla Street.

Tuod man, kay kalit-kalit man ang pagsirado sa karsada nga way abiso sa mga motorista, nagkaguliyang ang mga sakyanan. Abtik kaayo nga si Archival nakapanghunaw kay dili kuno siya ang nagmando niini.

Apan yuna pa, dili ba imo man nga department head si Raquel Arce nga nagdumala sa CCTO? Angay ba gud nga ang CCTO mananghid gyud sa mayor kon duna sila’y himoon?

Dili ba duna ka may gimugna nga Cebu City Traffic Board nga gipapangulohan nimo og kanhi konsehal, nga magsilbi nga policy-making body sa CCTO?

Kinahanglan pa gyud diay nga mananghid? Kon mao man gani na, dili na lang magtudlo og department head, ug ang mayor na lang maoy modumala sa tanan?

Dili ba diay maayo nga kon may sipyat ang imong department head mayor, moutong ka na lang og angkonon nga nasipyat mo? Unya, ipatawag nimo ang department head og imo siyang maymayan?

Law-ay man gud kaayo tan-awon sa mga tawo nga kon dunay sipyat, manghunaw dayon aron nga ingnon nga way labot. Mao na nga si Tomas moingon nga “playing safe” ka kanunay.

Karon, kining isyu kabahin sa paghipos sa mga basura, gitataw man gyud sa tagdumala sa Binaliw Landfill nga dili gihapon sila modawat og basura gikan sa siyudad, unsa may gihimo nimo?

Dili ba maayo nga kon dili man gani modawat ang tagdumala sa Binaliw Landfill sa mga basura sa siyudad, dili na lang sila tugotan nga maka-operate kay wa pa man kaha makompleto ang ilang mga dukomento?

Mitunga sa executive session sa City Council kaniadtong Martes ang mga opisyal sa Binaliw Landfill ug gitataw nila nga dili pa gyud sila makadawat og mga basura gikan sa siyudad.

Tan-aw nako kon si Tomas pa ang mayor, mihimo na gyud og estriktong lakang kabahin niini. Naa pay nasugdan na kaniadto ni kanhi Mayor Mike Rama nga pagguba sa kabalayan ug building sa 3-meter easement sa kasapaan, wa na padayona.